If To Say My Mind Get Charger

 We dey always charge phone, laptop, even power bank but who go charge us? Maybe the real recharge na when we finally rest our thoughts, not just our eyes.

 

Sometimes na no be battery low, na life don drain pass 1%.

 

My mind don dey show red light. The kind low battery wey no cable fit charge. I wake up every day dey press “continue,” but e be like say system no dey respond again.

 

People go talk, “Babe, you just need rest.” But rest don turn luxury. You go lie down, close eye, yet your brain go still dey attend meeting wey nobody schedule. You dey think about work, people wey ghost you, destiny wey still dey traffic.

 

Sometimes I dey reason say if mind get charger like phone, I for plug am inside socket make e full again. But life no design am like that. The only charger wey e get na peace, and peace no dey for market.

 

You fit scroll Instagram reach morning, but validation no go full your bar. You fit gist, laugh, even dey shout “No wahala!” but small voice for inside still dey whisper, “girl, you dey okay so?”

 

Truth be say, this mind no be generator; e need quiet to refuel.

So I dey learn small-small to unplug from noise, from people, and even from myself sometimes.

Because if your mind blow fuse finish, nobody go repair am for you.