Sleep No Gree Me Last Night

Sometimes, no be sleep we dey find but na peace of mind. But until we catch am, sleep go just dey play hide and seek. E be like e don watch the feem 'Legend of the Seeker' come dey use me do practical.

True true o, sleep no gree me last night. I turn left, I turn right, e still dey do hide and seek with me. My body tired but my mind no wan hear word. Thoughts just dey waka upandan like danfo wey no get conductor.

I think about bills, people wey don vex me, people wey I vex, dreams wey I never chase, and some wey don chase me reach half-road. Even the mosquito for my ear sef dey reason life with me, “Oga, you never pay rent, abi na only me go suffer?”

Na that kind night you go realise say silence get noise. Fan dey blow but e no cool anything. Even my phone screen bright pass my future that moment. I scroll, I scroll, as if Instagram fit drop sleep for my eyes.

But you see, sometimes, when sleep no gree come, e dey try tell you say, “My guy, rest no just mean close eye.” E mean peace for inside. If your mind still dey race marathon, how body wan rest?

So I off the light, put phone for one side, and tell myself say e don do. I begin pray small-small, gist with God like padi wey never see for long. Na there calm come first, before sleep later gree me. Because sometimes, the real sleep no dey come from bed or pillow, e dey come when your heart finally quiet.

Abeg make we all consider this;

For those nights wey sleep no gree come, e no mean say na punishment we dey face. Maybe e just reminder say peace no dey far, e dey wait make we first drop the load wey we dey carry for inside mind, including people wey don vex us and people wey we don vex.